Лӱдшӧ мераҥ

Мераҥ, эрден эрак помыжалтын, пасуш кудалеш. Вашкышыжла, шудышырчыкым тошкал колта. Тидлан шудышырчык сыра, мераҥ пӧртым муын, пырдыж шелшыш пурен шинчеш. Кас лиймеке, мераҥ пӧртышкыжӧ толын пура. Тидым шижын, шудышырчык чик-чирик, чик-чирик муралтен колта. Мераҥ пылышым шогалта. Шудышырчык адак чик-чирик, чик-чирик муралта.

Мераҥ пеш чот лӱдеш. Уло кертмыж дене чодыраш лектын кудалеш. Кудалшыжла, рывыжым вашлиеш.

— Куш кудалат, мераҥ? — йодеш рывыж.

— Эй, рывыж тос. Пӧртышкем ала-кӧ пурен. Поктен лукташ полшо.

— Кузе ом полшо, полшем,— манеш рывыж.

Мераҥ ден рывыж пӧрт дек кудал толыт. Омсам почын, рывыж вуйжым чыка. Тунамак шудышырчык чик-чирик, чик-чирик муралтен колта.

— Уке, мераҥ, мый лӱдам. Тыйын пӧртышкет ала-кӧ пурен,— манеш рывыж, лӱдын, чодыраш кудал йомеш.

Мом ышташ? Мераҥ чылт ӧрын. Ойгыж дене шортынат колта. Пӧртшӧ воктен ятыр шинчат, адак чодырашке кудалеш. Пирым вашлиеш.

— Ну, мераҥ, кочкам вет,— манеш пире.

— Шого, ит коч, пире изай. Мыйын пеш кугу ойго вет.

— Мо тугай?

— Пӧртышкем ала-кӧ пурен. Поктен лукташ полшо,— манеш мераҥ.

Пире ӱждымӧ унам поктен лукташ кӧна. Коктын мераҥ пӧртыш кудалыт. Толын шуыт. Пире пӧртыш пурен шогалеш, кычкырал колта:

— Кӧ мераҥ пӧртыш пурен, лекше!

Шудышырчык чик-чирик, чик-чирик муралтен колта. Йӱкым колын, пире лӱдеш. Пӧрт гыч лектеш да чодырашке кудалеш.

Мераҥ адак шкетак кодеш. Пӧртыш пураш лӱдеш. Шортын шинча-шинча да адак чодырашке кудалеш. Тушто маскам вашлиеш.

— Куш кудалат, мераҥ? — йодеш маска.

— Э, Миша изай, ала-мом гына ыштыман?

— Мо тугай?

— Пӧртышкем ала-кӧ пурен. Иктат поктен луктӹн ок керт. Рывыж декат миенам. Пират миен ончыш.

Чыланат лӱдыт. Ынде тыяк полшен кертат гын веле.

— Кӧ тугай пурен? Ончалшаш, ончалшаш,— манеш маска.

Коктын мераҥ пӧртыш каят. Миен шуыт, маска пӧртыш пурен шогалеш да каласа:

— Кӧ мераҥ пӧртыш пурен, лекше! Уке гын кырен колтем!

Шудышырчык чнк-чирик, чик-чирик муралтен колта. Маска, тыгай йӱкым колын, пылышым шогалта. Шудышырчык адак чик-чирик, чик-чирик муралта. Маска лӱдеш. Кыбыз-кобыз пӧрт гыч лектын, чодыраш кудалеш.

Мераҥ адак шкетак кодеш. Мом ышташ? Куш пураш? Мераҥ шортеш. Ты жапыште мераҥ дек агытан толын лектеш.

— Мераҥ, молан тынар шортат? — манеш агытан.

— Кузе от шорт. Пӧрт деч посна кодынам.

— Кузе туге?

— Ала-кӧ пурен. Иктат поктен луктын ок керт.

— Айда ончена. Кӧ тугай пурен?!

Агытан, кыдетлен-кыдетлен, пӧртыш пура да му-ралтен колта:

— Ку-ка-ре-ку-у! Мераҥ пӧртыш кӧ пурен?!

Шудышырчык чик-чирик, чик-чирик муралта. Тидым колын, агытан, пырдыж дек миен, шелше гыч шудышырчыкым чӱҥгал луктеш да кочкын колта.

Э, тидлан мераҥ куана. Чыла чодырасе янлык-влакым шкеж дек ӱжын конда. Чыланат агытаным моктат. Агытанже, койышланен, шулдыржым пералтен, муралтен колта:

— Мый эн тале ула-ам!

Тиддеч вара мераҥ шке пӧртешыжак кодеш.