Тумна ден рывыж


Тумна чашка вуеш пыжашым ышта. Кум игым луктеш. Тушко рывыж толеш да муралта:

Тумна, тум-тум, Ик игетым кудалте, тум-тум, Кӱзенат кочкам, тум-тум, Воленат кочкам, тум-тум, Руэнат кочкам, тум-тум, Ик игетым кудалте, тум-тум!

Тумна шортеш-шортеш, ик игыжым кудалта. Рывыж тудым ер воктек наҥгаен, кочкеш.

Эр лиеш, рывыж адак тумна дек толеш да муралта:

Тумна, тум-тум, Ик игетым кудалте, тум-тум, Кӱзенат кочкам, тум-тум, Воленат кочкам, тум-тум, Руэнат кочкам, тум-тум, Ик игетым кудалте, тум-тум!

Тумна шортеш-шортеш да адак вес игыжым кудалта. Рывыж тумна игым налын кая, ер воктен кочкеш. Тумна мӱгырен-мӱгырен шинча. Шогертен толеш.

— Молан мӱгырет, тумна? — манеш шогертен.

— Мом от мӱгырӧ? — манеш тумна.— Рывыж толешат, лӱдыктен-лӱдыктен, игем-влакым кудалташ йодеш.

Шогертен манеш:

— Кӱзен кочкашыже кидше уке, руэн кочкашыже товарже уке, молан рывыжлан игетым пукшет?

Шогертен чоҥештен кая. Эр лиеш. Рывыж адакат толеш да муралта:

Тумна, тум-тум, Ик игетым кудалте, тум-тум, Кӱзенат кочкам, тум-тум, Воленат кочкам, тум-тум, Руэнат кочкам, тум-тум, Ик игетым кудалте, тум-тум!

Тумнаже манеш:

— Молан тылат игем кудалтем? Кӱзен кочкаш — кидет уке, руэн кочкаш — товарет уке, кызытат кок игем ондален кочкыч.

— И-и, тыге шогертен каласен! — манешат, рывыж кая.

Кая-кая, ер воктен возеш, колышын койын кия. Шогертен рывыж деке толеш, муралта:

Шинча коят коеш — чыгырдык, Шинча коят коеш — чыгырдык!

Рывыж деке шогертен мия, шинчажым чӱҥгалаш тӧча, рывыж тудым руалтенат куча.

— Молан тумналан каласышыч? — манеш.

— Каласенам гын, мо лийын? — манеш шогертен.

Рывыжше ойла:

— Тыйым кырен пуштам!

Шогертенже манеш:

— Кырет гынат, ом коло, тошкет гынат, ом коло, кум пырче почем кучен, шӱйшӧ кашкаш лупшалат гын веле колем.

Рывыж шогертеным кум пырче почшо гыч кучен лупшал колта, кидешыже кум пыстыл веле кодеш. Шогертен чоҥештен кая да манеш:

— Рывыжым ондалышым, рывыжым ондалышым!

Йомак — умбак, мый — тембак.


Сайт создан в системе uCoz