Рывыж ден ур

Марий кайыквусо кучаш олыкеш вынемым кӱнча да йырже тӧрлен шында. Тудо вынемыш ур олык гоч кудалшыжла пурен кая. Тудым почешыже рывыж поктен, тудат вынемыш пурен кая. Ур вынем йыр пеш кудалыштеш да ойла:

— Мыйын шӱдӧ шонымаш,— манеш.

— Мыйын ик шонымаш гына,— ойла рывыжше.

Тыге нуно эр марте илат. Эрдене марий толеш.

Рывыж, марий толмым шижын, колышо гай лийын возеш. А ур эре йыр кудалыштеш.

Марий вынемым почын ончалеш.

— Эх, могай пиал! Коктын улыт,— манеш.— Но рывыжше чытен кертын огыл, ужат, коленат колтен.

Марий, вынемыш пурен, рывыжшым, налын, кӱш шуа. А ур марийлан шкенжым ынеж кучыкто, эре вынем йыр кудалыштеш. Марий тудым куча да пуштеш. Рывыж тыгутлаште кудал колта. Марий лектын онча — рывыж уке. Марий ик ур дене мӧҥгышкыжӧ кая.